我的名字 - 大細妹

我的名字 - 大細妹。媽子話我因爲對眼睛一隻大一隻細，比麥豆改咗我個名做大細。又因為我係一個女仔，細細個既妹子，叫下叫下，就叫咗做大細妹。

四個月大既時候，比麥豆同媽子抱咗番屋企。之前係寵物店個細劏房住個陣，已經成日見到佢兩個，一個麻甩婆，一個耳環仔踎係個玻璃外面望我。有一晚走咗入黎，抱咗我一陣，又同我劏房個業主傾咗一陣，就走咗。我諗佢地想搬埋入黎住，但係以耳環仔個身型一定唔夠位瞓，所以佢地放棄咗。咁我都放心D。萬一佢地搬黎，就算我幾細粒都無哂定企，到時真係妻涼。

諗住好啦，可以瞓一陣，點知佢地兩隻野又番黎。業主仲比咗好多野佢地，然後，喂，做咩？做咩捉我出黎？唔好搬走我，搬走我，佢地都唔夠瞓。喂？喂？做咩事！

業主將我交比咗麻甩婆，麻甩婆笑騎騎話：我地番屋企喇！ 跟住耳環仔抱住我：大細妹去街街喇！

就係咁，我變咗大細妹，麻甩婆變咗媽子，耳環仔變咗麥豆，最開心就係聽到番屋企同去街街。