煲湯-烏雞椰子黑豆雪耳

湯水係好緊要。但係每想起煲湯個陣，就會毫無頭緒。無理由餐餐都青紅蘿蔔，蕃茄薯仔咁寡，上網搵到樣好野，烏雞椰子黑豆雪耳湯。據說係有美顔潤白既作用，當然最緊要係好味。連一個最討厭有生果成份既，都捧場飲兩大碗。所以推介大家試一試。

材料很容易買，街市一隻竹絲雞大概50蚊左右，可以叫店主幫你去頭尾，開一半煲湯用。 椰子係菜檔買，佢會幫你開埋，椰子水就另外裝比你，留番雪凍飲又得，放埋落去煲湯都得。 黑豆，雪耳，紅棗，陳皮，都係街市賣藥材既地方，每樣執少少，價錢20-30蚊左右，多咗就留番下次用。 材料用一般方法處理，竹絲雞洗乾淨，唔需要飛水。 一個雪耳，未發前一個拳頭咁上下大，浸到開花咁，剪咗中間黃咁咁，硬掘掘個部份，撕開一少片一少片。 紅棗10粒度啦，睇你有幾喜愛，唔好多過廿粒。

陳皮半塊浸下洗下，無特別要注意。 椰子肉同椰子水都放一半，另一半我留番黎凍食。 只係黑豆，需要處理一下。半個飯碗既份量，要用白鑊，即係無加油既，加熱咗既鑊，中水炒到佢塊皮爆開，佢爆開你會見到入面係白白地色，就好收手，唔好炒到爆谷咁開哂花。 整好哂就煲大半煲水，（20寸staub就2/3水），放雞，滾起咗就放埋其他，因為雪耳會越煲越多膠質，唔想個湯太稠，雪耳到最後半個鐘先落會清d，想滋潤d就一開始就落，有機會煲完雪凍當mask咁敷。 煲湯其實唔難，睇火先難。細火煲兩個鐘就飲得。得閒試下。