請別再相信 Food Court 的日式速食

工作關係，午飯的要求係快。唔係有食便便的感覺就OK。

但係今日，我錯到一個極點。幫襯咗海港城個 FOOD COURT裡面的一間日式料理。慘無人道！

滑蛋吉列豬扒飯，外表係無問題，滑蛋個蛋唔係全熟，絕對可以接受。

咁FOOD COURT 預咗唔會比厚切你啦，我明。咬一口豬扒，WOW，D粉厚過大陸網紅臉上D個層，你睇唔睇到豬扒？睇唔到咩？連食都食唔到，你睇唔到唔出奇的，唔好怪自己。

個飯底都唔係乾增增，都算多汁汁，點知，又係天氣不似預期。個汁汁似係兩湯匙鹽加兩滴豉油，倒落100ML清水入面混合而成。呢種味道，如果你有玩俄羅斯輪盤，溝野比輸咗個條友仔飲既遊戲，你就知煙頭水茄汁生雞蛋，都唔夠兩滴豉油加梳打水咁恐怖。嘔呀！

算喇，算喇，我食鳥冬算喇，呀！我一定係踏死咗好多螞蟻，無理由會有咁既下場。係蒸魚既蔥，未炒過既芝麻，本地薑蓉，中間未熟既烏冬，加～加～加～又係你系列之兩滴鰹魚汁加100ML涼開水！吊你隻隔夜涼鞋！我會接受呢個教訓，恨恨地食哂佢，再難食都唔可以浪費！天呀！

都係個句，人有三衰六旺，無論我點形容，你仍然可以去試，因為憑你既運氣，可能會有唔同既遭遇。